- Detalles
O vindeiro sábado 28 de xaneiro ás 17:00 horas acollemos na sede da Fundación Xosé Neira Vilas un encontro co profesor Xesús Alonso Montero.
A charla, na que tamén intervirán o presidente da Real Academia Galega, Víctor F. Freixanes, e o secretario xeral de Política Lingüística, Valentín García, xirará ao redor da correspondencia que o autor de Gres mantivo con persoeiros da cultura galega tales como Francisco Fernández del Riego, Manuel María, Ramón Piñeiro, Celso Emilio Ferreiro ou Isaac Díaz Pardo, entre outros. A parte musical do evento estará a cargo de Manoele de Felisa.
- Detalles
O auditorio Neira Vilas da Cidade de Cultura foi o escenario esta tarde dun dobre acto literario organizado pola Fundación que leva o nome do autor de Memorias dun neno labrego: a entrega do premio Arume a Antón Cortizas polo poemario Os versos da Mariola. O autor galardoado non puido acudir á entrega por motivos de saúde e recolleu o premio no seu nome Miguel Toval, de Edicións Embora, que publicará o texto premiado. Por outro lado, tivo lugar a presentación dos libros premiados na edición de 2021: Violeta Parapluie, de Ramón D. Veiga, e A flor da letra, de Manuel López Rodríguez, gañadores da edición anterior.
O premio Arume, o único en Galicia dirixido especificamente á infancia, é unha iniciativa conxunta da Fundación Xosé Neira Vilas, a empresa Deleite (do grupo Leite Noso), unha empresa galega recoñecida polo seu compromiso con todas e cada unha das actividades e proxectos vencellados á cultura e a lingua galega, e GÁLIX, sección galega da OEPLI (Organización Española para el Libro Infantil y Juvenil) e representación do ámbito lingüístico galego no IBBY (International Board on Books for Young People).
- Detalles
Os versos da mariola reivindica o xogo tradicional a través da poesía, unha sorte de brincadeira coa palabra poética como vehículo para achegarse a un encontro entre a rapazada, máis alá da tecnoloxía ou as pantallas que predominan no tempo de vagar da infancia de hoxe en día. Trátase dunha proposta lúdica, atraínte por orixinal e pola riqueza da linguaxe. Así o salientou o xurado, composto por Xosé Antonio Perozo, presidente de GALIX, Rosalía Morlán e Pilar Sampedro, en representación, ambas as dúas, da Fundación Xosé Neira Vilas. O Premio Arume é unha iniciativa conxunta da Fundación Neira Vilas, a empresa Deleite e a asociación GALIX, con Embora como empresa editora dos libros premiados. A entrega do premio terá lugar no auditorio Xosé Neira Vilas da Cidade de Cultura o 16 decembro ás 18.00 h.
- Detalles
O xurado da sétima edición do Premio Xosé Neira Vilas de Novela Curta decidiu por unanimidade, conceder o galardón á obra Cristais rotos, de Álvaro Domínguez. O xurado, composto por Juan Andrés Fernández, Rosalía Morlán e Armanda Requeixo, argumentou a súa decisión na forza narrativa dun relato que mergulla ao lector nas vivencias duns personaxes que beirean a traxedia, que profundan nas luces e sombras dunhas vidas golpeadas polo destino. Asimesmo, salientou a habelencia na orquestración estrutural da obra, na que conflúen tramas alternas e complementarias, escritas cunha prosa brillantemente perfilada de diálogos áxiles e cheos de verosimilitude.
- Detalles
O vindeiro luns, 17 de outubro ás 17.00 h., conmemoramos un ano máis o Día das escritoras, en colaboración coa Biblioteca Nacional. "Trece anos lembrando a Anisia" será o lema baixo o que homenaxearemos a figura e obra de Anisia Miranda. O cemiterio parroquial de Gres acollerá unha ofrenda floral e a lectura de textos, algúns inéditos, da autora cubana.
Páxina 4 de 11