- Detalles
O 3 de novembro, Día de Neira Vilas e Día da Lectura, remata o prazo para a recepción de orixinais que concorran a esta terceira edición do Premio Arume de Poesía para a Infancia, que organizan conxuntamente a Fundación Xosé Neira Vilas, GALIX e Deleite. O galardón conta cunha dotación de 1000 euros e será publicado por Edicións Embora. As obras candidatas, de temática libre e acaída para un publico infantil e xuvenil, terán unha extensión mínima de 350 versos e poderán conformar un só poema ou un grupo de poemas. A entrega do premio terá lugar o 15 de decembro de 2023.
- Detalles
Un ano máis, con motivo do Día das Escritoras, a Fundación Xosé Neira Vilas rende homenaxe a Anisia Miranda, unha das fundadoras desta entidade e primeira vicepresidenta da mesma. A fundación únese deste xeito á iniciativa da Biblioteca Nacional, de maneira que o 16 de outubro terá lugar unha ofrenda floral no cemiterio de Gres, acompañada da lectura pública de diversos textos literarios, tanto da propia Anisia Miranda como doutras escritoras, incluíndo neste último caso as propostas polas Bibliotecas Escolares de Galicia, como tamén pola Biblioteca Nacional. Haberá así ocasión de escoitar textos escritos nas catro linguas do Estado.
- Detalles
A Fundación Xosé Neira Vilas convoca, na súa oitava edición, o Premio Xosé Neira Vilas de Novela Curta para obras en lingua galega destinadas ao público infantil e xuvenil, e que está dotado con 1.000 euros e a edición do texto.
O prazo de presentación de orixinais está aberto ata o 9 de outubro de 2023 e estes deberán ser inéditos e ter un mínimo de 50 páxinas e un máximo de 150, mecanografados en letra Times New Roman de corpo 12 e a dobre espazo.
O premio entregarase o 3 de novembro de 2023, coincidindo co aniversario do nacemento de Xosé Neira Vilas e co Día da Lectura.
As bases completas poden consultarse nesta ligazón:DESCARGAR AS BASES DO PREMIO
- Detalles
As Insuas de Gres acollen, un ano máis, a presentación da obra gañadora do Premio Xosé Neira Vilas de Novela Curta. O acto ten lugar o sábado 29 de xullo, ás 19. 00 h. Fóra de rexistro, de Virxilio Rodríguez Vázquez, foi a elixida na edición do citado galardón no ano 2021 por parte dun xurado formado por Juan Andrés Fernández, Henrique Neira e Armando Requeixo.
- Detalles
A escritora Ledicia Costas estará na Fundación Xosé Neira Vilas o vindeiro 30 de xuño ás 18.00 h., nunha visita enmarcada nos Encontros Literarios en Gres, para compartir co público asistente a súa experiencia na escrita para o público
infantil e adulto, os seus métodos de traballo ou a pegada da obra de Neira Vilas na súa produción literaria.
Ledicia Costas é unha das autoras en lingua galega que máis éxito está acadando entre a crítica e o público lector nos últimos anos, como quedou demostrado, por exemplo, con títulos como Infamia (2019). Autora ou coautora de máis de 45 libros de literatura infantil e xuvenil, poesía e narrativa para persoas adultas.
Gañadora de 24 premios literarios, entre eles hai que salientar o Premio Nacional de Literatura infantil e xuvenil de España en 2015, pola obra Escarlatina, a cociñeira defunta e os tres Premio Lazarillo que recibiu polas novelas Jules Verne e a vida secreta das mulleres planta, A balada dos unicornios e A lebre mecánica. O seu galardón máis recente é o Premio de Poesía Afundación, por Ultraluz, que lle foi concedido en 2022.
Páxina 3 de 11